„Listin er veruleiki þar sem allir draumar rætast“ stendur í sýningarskrá um sýningu á verkum Magnúsar Á. Árnasonar frá árinu 1930. Listferill Magnúsar Á. Árnasonar (1894-1980) hófst fyrir alvöru þegar hann fór til náms í Kaupmannahöfn árið 1912. Hann ætlaði sér að verða portrett málari í upphafi listferils síns, en byrjaði síðan að mála landslagsmyndir með vatnslitum þegar systurdóttir hans dó, en hún hafði verið hans helsta fyrirsæta. Magnús dvaldi í Bandaríkjunum í rúm 12 ár og stundaði meðal annars nám þar. Viðhorf Magnúsar gagnvart listinni einkenndist af metnaði og mikilvægi þrotlausrar vinnu. Hann hélt því fram að það hefði lítið upp á sig að listamaður biði aðgerðarlaus eftir uppljómun heldur verði hún til í kjölfar mikillar vinnu. Verkið Haustlauf í París er frá 1952 og er 65x50cm að stærð. Verkið er í eins konar depilstíl (e. pointillism), stíll síðimpressjónistanna, sem fór að einkenna mörg verk Magnúsar á sjötta áratugnum og þá sérstaklega verk hans frá Frakklandi. Hann fylgdi þó ekki depilstílnum til hins ítrasta á hefðbundinn hátt.
Barbara M. Williams myndlistarkona var eiginkona Magnúsar og kynntust þau árið 1936. Stór hluti verka þeirra hjóna voru gefin Gerðarsafni af minningarsjóði Barböru og Magnúsar.
