Gerður (1928-1975) kynntist fyrst höggmyndalist þegar hún var 18 ára gömul og fór hún strax að móta sjálf í leir og höggva í grágrýti. Listsköpun hennar þróast svo yfir árin og fer hún að gera fígúratív verk, fíngerða járnskúlptúra og skúlptúra unna úr bronsi m.a. Undir lok sjötta áratugs fer Gerður að vinna mikið með verk úr steindu gleri og síðar úr gleri og steypu.
Verkið „Sitjandi kona” er frá árinu 1947 og er það 87,7 x 59 x 54 cm að stærð. Gerður vann verkið úr grástein og hafði hún verið að höggva í grástein í fjörunni í Laugarnesinu allt sumarið árið 1947 af mikilli vinnusemi. Sigurjón Ólafsson kom við hjá henni um sumarið og leiðbeindi Gerði um notkun áhalda til steinhöggs og fleira.
„Sitjandi kona” kom inn í safneign árið 1977 og var það partur af veglegri gjöf frá erfingjum Gerðar. Gerður Helgadóttir afkastaði miklu á stuttri starfsævi. Sjálf leit hún fyrst og fremst á sig sem myndhöggvara. Eftir nám í Handíðaskólanum fór Gerður til náms í Flórens og París og hlaut þar menntun í klassískri höggmyndagerð og nútíma höggmyndalist. Í París bjó Gerður stærstan hluta starfsævi sinnar og töldu franskir listgagnrýnendur hana vera meðal áhugaverðustu myndhöggvara í borginni á þeim tíma. Gerður var mjög sjálfstæð kona og frumkvöðull í glerlist hér á landi.
