Verkið haustlitir eftir Magnús Á. Árnason (1894-1980) kom inn í safneign Gerðarsafns árið 1983 en verkið sjálft er frá árinu 1975. Um er að ræða olíuverk á masónít og er það 44 x 56 cm að stærð. Magnús var mikill náttúruunnandi og málaði hann mikið af landslagsverkum. Hann gerði þó nokkuð margar myndir af trjám, plöntum og blómum. Í þessu verki skartar náttúran sínum fallegu haustlitum. Litabreytingin á laufblöðunum gegnir því mikilvæga hlutverki að undirbúa trén fyrir vetrardvala þeirra. Haustlitirnir í náttúrunni brjóta upp hversdagsleikann og hafa margir það fyrir venju að gera sér ferð á Þingvelli t.d. þegar haustlitirnir skarta sínu fegursta.
Listamanninum Magnúsi Á. Árnasyni var margt til lista lagt, hann var myndlistarmaður, tónskáld og rithöfundur. Magnús fór til Kaupmannahafnar í nám árið 1912 og hófst listferill hans þá. Hann ætlaði sér að verða portrett málari í upphafi listferils síns, en byrjaði síðan að mála landslagsmyndir með vatnslitum þegar systurdóttir hans dó, en hún hafði verið hans helsta fyrirsæta. Magnús dvaldi í Bandaríkjunum í rúm 12 ár og stundaði meðal annars nám þar. Hann giftist listakonunni Barböru Moray Williams Árnason og hlotnaðist Gerðarsafni sá heiður að eignast mikið af verkum eftir þau hjónin.
