Lokahátíð Skapandi sumarstarfa

25.07.2019 17:30

Á lokahátíð Skapandi sumarstarfa munu sjö verk verða sýnd á Gerðarsafni. Verkin munu nýta hljómburð safnsins til þess að skapa einstaka stemmingu og mun dagskráin taka um tvo klukkutíma. Frá 17:30 til 19:30 gefst gestum færi á að ferðast um safnið og fylgjast með verkunum bæði á neðri og efri hæð. 

17:30 - Tilraunakennda brúðuleikhúsið

Andrés Þór Þorvarðarson og Rakel Andrésdóttir eru brúðugerðarfólk en núna verða brúðurnar stjórnendurnir og láta skapara sína flytja tónlist.

17:45 - Frá rótum til fóta

eftir Agnesi Ársælsdóttur er popp ópera um aðgerðarsinnaðar hunangsflugur, konu með umhverfiskvíða og paradísartré í tilvistarkreppu.

18:05 - Örbrot/Óvissulögmálið

er samvinnuverkefni Evu Línar Vilhjálmsdóttur, Eyju Orradóttur og Rögnvaldar Konráðs Helgasonar þar sem texti, mynd og tónverk koma saman. Verkið er samið fyrir þrjá flytjendur, söng og slagverk.

18:15 - Drottningin af SaBa

samanstendur af Salóme Katrínu Magnúsdóttur og Baldvini Snæ Hlynssyni. Þau munu flytja nokkur frumsamin lög með strengjakvartett.

18:30 – Ómverund

eftir Þorstein Eyfjörð er hljóðgjörningur í sýningarsal Gerðarsafns eftir þar sem óhefðbundin eða heimsmíðuð hljóðfæri verða í forgrunni og áhersla lögð á efniskennd og mynstur í hljóðvist rýmisins.

18:45 - K.óla

er listamanna nafn Katrínar Helgu Ólafsdóttur. Hún mun spila nokkur lög af nýútkominni plötu með vinum.

19:00 – VERA

er samstarfsverkefni Bjarteyjar Elínar Hauksdóttur og Margrétar Rúnar Styrmisdóttur. Ekki er allt sem sýnist á tískusýningu VERU. Fylgist með þegar að tónlistin tekur völdin hjá módelunum á tískusýningunni.

19:30 - Dagskrá lýkur

20:00 - Safnið lokar