Verið velkomin á listsmiðju í anda Gerðar Helgadóttur fyrir alla fjölskylduna með Helgu Páleyju Friðþjófsdóttur laugardaginn 7. september kl. 14:00 í Gerðarsafni. Helga Páley myndlistarmaður myndskreytti barnabókina Heimur Gerðar Helgadóttur. Smiðjan er hluti af dagskrá Heilsum hausti.
Í Gerðarsafni, Náttúrufræðistofu og Bókasafni Kópavogs geta börn og fjölskyldur notið þess að skapa saman úr fjölbreyttum efnivið og á útisvæði verður hægt að fara í æsispennandi leiki þar sem við sögu koma risastórar sápukúlur og risastórar stultur, kúlubrautir, körfuboltatunnur og margt margt fleira. Skólahljómsveit Kópavogs býður upp á kraftmikla lúðrasveitasveiflu upp úr klukkan 13:30 en haustfögnuður stendur yfir frá 13 og fram eftir degi. Opið verður á Krónikunni þar sem hægt er að gæða sér á ljúffengum krásum.
Helga Páley Friðþjófsdóttir (f. 1987) býr og starfar í Reykjavík. Hún Lauk BA-prófi frá Listaháskóla Íslands árið 2011. Frá útskrift hefur Helga verið framkvæmdastjóri listahátíðarinnar Ærings á Rifi 2012. Frá árunum 2013 til 2015 var Helga partur af Kunstschlager hópnum og tók þátt í að reka gallerí við Rauðarárstíg 1 og síðar í Listasafni Reykjavíkur. Síðustu ár hefur Helga sýnt á fjölmörgum stöðum og þar má nefna Listasafn Reykjanesbæjar, Ásmundarsal og Safnasafninu á Svalbarðseyri. Teikningin hefur lengi verið henni hugleikin og spilar hún stóran sess í hennar listsköpun. Með teikningu hripar hún hugmyndir á blað, gefur þeim tíma til að gerjast áður en þær færist yfir á striga eða í þrívítt form.
Ljósmynd: Sigríður Rut Marrow.
