Tónlistarhópurinn Skerpla kemur fram á síðdegistónleikum í Gerðarsafni þar sem hann skapar hljóðheim og viðbragð við verk á samsýningunni Skúlptúr/Skúlptúr.
Skerpla, sem starfar innan Listaháskóla Íslands, skapar og flytur tónlist af tilraunakenndum toga með það að markmiði að víkka út hefðbundnar hugmyndir um tónlist. Hópurinn hefur komið fram á fjölda tónleika og hátíða, má þar nefna Sequences, Myrka músíkdaga, Hönnunarmars og Hljóðön í Hafnarborg. Listrænn stjórnandi hópsins er Berglind María Tómasdóttir.
Þrennir tónleikar Skerplu eru fyrirhugaðir í tengslum við sýninguna í Gerðarsafni; miðvikudagana 18. október, 15. nóvember og 5. desember. Tónleikarnir hefjast klukkan 17 og standa yfir í 30 – 40 mínútur.
Skerplu skipa Aiden Dumitru, Baldur Snær Bachmann. Diana Burkot, Egill Ásdísarson, Eydís Egilsdóttir Kvaran, Eyrún Úa Þorbjörnsdóttir, Karolis Dabulskis, Konrad Stanislaw Groen, Konstantine Vlasis, Kristrún Steingrímsdóttir, Lidong Lin, Michael Richardt Petersen og Ólöf Sigríður Valsdóttir.
Sýningin Skúlptúr/Skúlptúr er samsýning tíu ólíkra listamanna sem hverfist um skúlptúrinn og ólíkar birtingarmyndir hans í samtímalist. Listamennirnir tíu koma úr ólíkum áttum en hafa allir sett mark sitt á íslenska samtímalist með einum eða öðrum hætti. Hér er reynt á mörk miðilsins- hvað varðar stærð, tækni, rými, viðhorf og hlutverk okkar sem áhorfanda en listamenn sýningarinnar eru Andreas Brunner. Anna Líndal, Claire Paugam. Elísabet Brynhildardóttir, Eygló Harðardóttir, Geirþrúður Finnbogadóttir Hjörvar, Ingrid Ogenstedt, Ívar Glói Gunnarsson Breiðfjörð, Martha Haywood og Raimonda Sereikaité. Sýningarstjórar eru Brynja Sveinsdóttir og Cecilie Gaidhede.
Ókeypis er á tónleikana fyrir nemendur LHÍ. Miði á sýninguna gildir að öðrum kosti en almennt miðaverð er 1200 krónur og 600 krónur fyrir aldraða. Frítt fyrir börn og ungmenni yngri en 18 ára, öryrkja og félaga í SÍM, ICOM og FÍSOS gegn framvísun skírteinis.
