Verið velkomin á tónlistarflutning Páls Ragnars Pálssonar og Tui Hirv inn í yfirlitssýningu Valgerðar Briem miðvikudaginn 14. október frá 12:15-13:00.
Aðgangur ókeypis og öll velkomin
Páll Ragnar Pálsson, gítarleikari og tónskáld, og Tui Hirv, söngkona og tónlistarfræðingur, ólust upp í sitthvorum heiminum, hann í íslensku rokksenunni með öllu því frelsi og leikgleði sem henni fylgdi, og hún í strang-akademísku skólakerfi Eistlands og kórmenningu. Leiðir þeirra lágu saman í tónlistarakademíunni í Tallinn og hafa síðan þá unnið saman að listsköpun, þar sem Tui hefur flutt tónverk Páls bæði hér og erlendis.
Lögin sem Tui og Páll Ragnar flytja á tónleikunum eru af væntanlegri pötu þeirra, Layers, sem gefinn er út af Sono Luminus þann 23. október næstkomandi. Á plötunni eru útsetningar Tui og Páls á gömlum trúarlegum þjóðlögum, flest þeirra frá Eistlandi, en einnig frá norðurlöndum og Bretlandi. Lögin hafa verið sungin í hundruði ára og mótast eftir flytjendum og aðstæðum. Nafn plötunnar vísar þannig til uppruna laganna og hvernig þau hafa átt sér sín ólíku líf í gegnum tíðina.
Valgerður vann oft lagskipt í sinni myndlist þar sem hún bætti einu lagi ofan á annað og leyfði ferlinu að ráða för. Páll og Tui vinna tónlist sína á sambærilegan og heiti plötunnar Layers er dregið af þeirri nálgun. Á kápu plötunnar er mynd af verki úr seríunni Landlit eftir Valgerði Briem.
